Dowladda Itoobiya ayaa ciidamo badan oo gaashaaman kusoo daabushay xadka ay la wadaagto Soomaaliya, iyadoo xaaladda xiisadda u dhaxeysa labada dal ay meel xasaasi ah marayso.
Tallaabadan ayaa timid maalmo kadib markii Soomaaliya ay heshiis milateri la saxiixatay Masar, kaas oo Masar qorsheyneyso in 10,000 oo askari ay ku keenayso gudaha Soomaaliya si ay qeyb uga noqdaan howl-galka cusub ee nabad ilaalinta.
Dowladda Federaalka Soomaaliya ayaa muujisay walaac weyn oo ku saabsan dhaq-dhaqaaqyada ciidanka Itoobiya, taasoo ku sababsan in Itoobiya ay dooneyso inay ka mid noqoto howl-galka cusub, iyadoo ku xad-gudubaysa qaranimada Soomaaliya.
Tallaabadaasi ayaa sidoo kale ku tirtay xiriirkii labada dal, maadaama Soomaaliya ay dooneyso in ciidamadii Itoobiya lagu beddelo kuwa Masar.
Xiisadda u dhaxeysa labada dal ayaa sidoo kale la xiriirta is-afgaradkii Somaliland ee badda, kaasoo Itoobiya ogolaansho ka siisay inay ku gaarto biyaha Soomaaliya.
Is-afgaradkan ayaa si weyn uga careysiiyay dowladda Federaalka Soomaaliya, taasoo keentay in xiriirka labada dal uu sii xumaado.
Isku-dayo la sameeyay oo uu Turkiga hormuud ka yahay si loo xalliyo xiisadda ayaa weli miro-dhalin.
Turkiga ayaa laba jeer soo qabanqaabiyay kulan ay isugu yimaadeen wasiirada arrimaha dibadda ee Soomaaliya iyo Itoobiya, laakiin heshiis wax ku ool ah lama gaarin.
Labada dal ayaa hadda u ballansan wejiga saddexaad ee wada-hadallada, waxaana muuqata in isbeddel xooggan uusan dhicin.
Xiisadda cusub ee Itoobiya ay ku soo daabushay ciidamo badan ayaa keeneysa walaac weyn, iyadoo xaaladdu ay hadda gaartay heer xasaasi ah oo saamayn ku yeelan karta ammaanka gobolka.
Dowladda Soomaaliya iyo Masar ayaa dadaal xooggan ku bixineysa sidii loo xaqiijin lahaa nabadgelyada, iyagoo sidoo kale ka digaya tallaabooyinka Itoobiya ee kordhin kara khilaafka.