Safiirka Mareykanka ee Qaramada Midoobey, Linda Thomas-Greenfield, ayaa xalay si kulul u dhalleeceysay weerarada xargaha goostay ee Israel ay ku hayso shaqaalaha gargaarka ee ka hawlgala Marinka Gaza. Dhalleeceyntan ayaa timid ka dib markii Khamiistii ay Israel duqeyn ku dishay shaqaale la socday kolonyo gargaar oo ka shaqeynayay inay caawiyaan dadka rayidka ah ee ku sugan Gaza.
Haweeneydan diblomaasiyadda ah ayaa ku adkeysatay in Israel ay qaaddo tallaabooyin degdeg ah oo ay ku ilaalinayso dadka ka shaqeynaya howlaha samafalka, iyadoo sheegtay in shaqaalaha gargaarka ee Qaramada Midoobey ay yihiin kuwa aad muhiim u ah, loona baahan yahay in la siiyo badbaado buuxda. Thomas-Greenfield ayaa ku celcelisay in loo baahan yahay in si degdeg ah loo soo afjaro weerarada joogtada ah ee lagu hayo shaqaalaha gargaarka bani’aadantinimo, kuwaas oo xilli kasta wajahaya hanjabaadyo iyo weeraro culus.
Linda Thomas-Greenfield waxay ku adkeysatay in “Israel ay tahay inay qaaddo tallaabooyin la taaban karo, si ay u hubiso in shaqaalaha Qaramada Midoobey si buuxda loo ilaaliyo.” Waxa kale oo ay ka digtay in hanjabaadaha iyo weerarada ka dhanka ah hay’adaha samafalka ay sababi karaan inuu sii xumaado xaaladda bani’aadantinimo ee ka taagan Gaza, oo horey u ahayd mid aad u liidata.
Afhayeenka Wasaaradda Arrimaha Dibadda Mareykanka, Matthew Miller, ayaa isna Jimcihii si rasmi ah ugu eedeeyay ciidamada Israel inay rasaaseeyeen gaari ay leedahay Hay’adda Cunnada Adduunka (WFP), xilli uu ka qeyb qaadanayay kolonyo gargaar ah oo ku wajahnaa Buundada Waadi Gaza. Gaarigan ayaa habeenkii Talaadada la weeraray, iyadoo ay galbinayeen laba gaari oo gaashaaman, si loo hubiyo in gargaarka bani’aadantinimo uu gaaro dadka u baahan ee Gaza.
Miller wuxuu ku tilmaamay weerarkan mid “aad u murugo badan,” isagoo intaas ku daray in shaqaalaha gargaarka ay Gaza u joogaan inay caawiyaan dadka rayidka ah ee aan waxba galabsan, Israel-na ay tahay inay hubiso badqabkooda. Hay’adda WFP ayaa bayaan ay soo saartay ku sheegtay inay hakisay dhaqdhaqaaqa shaqaalaheeda ee Marinka Gaza illaa amar dambe, iyagoo ka jawaabaya khatarta amni ee sii kordheysa.
Intii uu socday dagaalka weli ka sii soconaya Marinka Gaza, in ka badan 250 shaqaale gargaar ayaa lagu dilay, taas oo muujinaysa heerka khatarta ay la kulmaan dadka ka shaqeynaya arrimaha samafalka ee ka howlgala Gaza. Israel waxaa si joogto ah loogu eedeeyaa inay si ula kac ah u bartilmaameedsato shaqaalaha gargaarka iyo gaadiidkooda, taas oo horseedaysa in shaqaalahaasi ay ku adag tahay inay gaaraan dadka ay caawinayaan.
Inkasta oo Mareykanku mararka qaar dhalleeceeyo ficillada Israel ee ka baxsan bani’aadantinimada, haddana waxaa lagu eedeeyaa inuusan si buuxda u adeegsan awooddiisa si uu u joojiyo dhiigga ku daadanaya Marinka Gaza. Dhaleeceyntan ayaa loo arkaa inay tahay isku day ay Washington ku muujinayso inay ka walwalsan tahay xaaladda bani’aadantinimo ee Gaza, hase yeeshee dadka qaar ayaa ku dooday in tallaabooyin dhab ah aysan ka iman Mareykanka oo awood weyn ku leh saameynta Israel.
Dhanka kale, dadka shacabka ah ee Gaza ayaa sii wajaaya xaalad nololeed oo aad u adag, iyadoo dagaalka iyo duqeymaha Israel ay sababeen burbur baahsan oo gaaray kaabayaasha nolosha. Gargaarka bani’aadantinimo ayaa noqonaya mid sii yaraada, iyadoo xaalada caafimaad iyo adeegyada kale ee bulshada ay yihiin kuwo aad u liita. Shaqaalaha gargaarka oo ah rajada kaliya ee dadkaas ayaa sidoo kale wajahaya halis joogto ah, taas oo caqabad ku ah gaarsiinta gargaarka loogu talagalay shacabka Gaza.