Mohamed Salah ayaa shaaca ka qaaday in xilli ciyaareedkan uu noqon karo kii ugu dambeeyay ee uu u ciyaaro Liverpool, iyadoo aysan jirin wax wada-hadal ah oo heshiis cusub looga hadlayo.
32-sano jirkan oo qandaraaskiisa uu dhacayo xagaaga soo socda ayaa sheegay in kulankii ay 3-0 kaga badiyeen Manchester United uu u arkay inuu yahay kulankiisii ugu dambeeyay ee Old Trafford.
Salah ayaa sidoo kale caddeeyay inuusan helin wax war ah oo ku saabsan qandaraas cusub oo ay kooxda la galeen.
Isagoo la hadlayay Sky Sports, Salah wuxuu yiri: “Waxaan dareemayaa inaan xor u ahay inaan ciyaaro kubadda cagta – waan arki doonaa waxa dhaca sanadka soo socda.”
Tababaraha cusub ee Liverpool, Arne Slot, ayaa isna ka hadlay xaaladda Salah isagoo sheegay inuu aad ugu faraxsan yahay sida Salah uu u ciyaaray kulanka, laakiin wuxuu diiday inuu faahfaahin ka bixiyo xaaladda qandaraaska.
Guushii ay ka gaareen Manchester United ayaa Liverpool ku hogaamisay kaalinta labaad ee kala sareynta Premier League, iyagoo kaliya ka dambeeya Manchester City.
Salah ayaa xilli ciyaareedkan si xoog leh ku bilaabay, isagoo dhaliyay seddex gool saddexdii kulan ee ugu horreysay.
Rikoodhada Salah ee ka dhanka ah Manchester United ayaa ah kuwo cajiib ah.
Wuxuu ku lug yeeshay 17 gool oo ka mid ah 23-kii gool ee ugu dambeeyay ee Liverpool ay ka dhalisay United, isagoo dhaliyay 11 gool isla markaana caawiyay 6 kale.
Salah ayaa sidoo kale 10 gool ku dhaliyay sagaal kulan oo uu ku ciyaaray Old Trafford.
Wuxuu sidoo kale noqday ciyaaryahankii labaad ee dhaliya 10 gool ama ka badan hal garoon oo banaanka ah ee kooxaha Premier League, tan iyo 1992-93, isagoo ku biiray Alan Shearer oo 10 gool ku dhaliyay Elland Road.
Salah ayaa noqday ciyaaryahankii ugu horreeyay ee shan kulan oo isku xigta gool ka dhaliya Manchester United Premier League-ga.